Dhimbja e mesit në punë: Parandalimi i dhimbjeve dhe dëmtimeve

Ngritja e peshave të rënda, lëvizjet e përsëritura dhe qëndrimi ulur gjithë ditën mund ta dëmtojnë gradualisht kurrizin tuaj. Më poshtë do të lexoni të gjitha faktet mbi dhimbjen e mesit në punë dhe si ta parandaloni atë

Dhimbja e mesit, e ngadaltë dhe e dhimbshme apo e mprehtë dhe therëse, vështirëson përqëndrimin në punë. Fatkeqësisht, shumë profesione, si ai i infermierit apo i punëtorëve të fabrikave dhe ndërtimit, kërkojnë kryerjen e punëve të cilat e përfshijnë shumë shtyllën kurrizore të personit. Madje edhe puna rutinë në një zyrë mund të shkaktojë apo ta përkeqësojë dhimbjen e mesit. Më poshtë do të kuptoni se çfarë e shkakton dhimbjen e mesit në punë dhe çfarë mund të bëni për ta parandaluar atë.

Shkaqet e zakonshme të dhimbjes së mesit në punë

Një sërë faktorësh mund të kontribuojnë në dhimbjen e mesit në punë. Për shembull:

· Forca. Ushtrimi i forcës së tepërt mbi kurriz, siç mund të jetë ngritja apo lëvizja e objekteve të rënda, mund të shkaktojë dëmtime.

· Përsëritja. Përsëritja e disa lëvizjeve specifike, veçanërisht e atyre që kanë të bëjnë me përthyerjen e shtyllës kurrizore apo disa lëvizjeve rrotulluese të saj, mund ta dëmtojnë atë.

· Pasiviteti. Një punë pasive ose një punë para kompjuterit mund të kontribuojë në dhimbjen e mesit, veçanërisht nëse mbani një posturë të gabuar të trupit ose qëndroni gjithë ditën ulur në një karrige me mbështetëse të papërshtatshme.

Dhimbja e mesit dhe faktorë të stilit të jetesës

Sigurisht faktorë të ndryshëm si mosha, obeziteti dhe kushtet e dobëta fizike mund të ndikojnë negativisht në dhimbjen e mesit. Duke qenë se mosha nuk është nën kontrollin tuaj, ju mund të fokusoheni në ruajtjen e një peshe të shëndetshme e cila minimizon tensionin në shtyllën kurrizore.

Filloni duke mbajtur një dietë të shëndetshme. Sigurohuni të merrni mjaftueshëm kalcium dhe vitaminë D. Këto lëndë ushqyese mund të ndihmojnë në parandalimin e osteoporozës, një sëmundje që shkakton dobësimin dhe hollimin e kockave dhe e cila është përgjegjëse për shumë nga frakturat e kockave që çojnë në dhimbjen e mesit.

Kombinoni ushtrime aerobike, sic mund të jenë noti apo ecja, me ushtrime që forcojnë dhe tërheqin muskujt tuaj të shpinës dhe të barkut. Ushtrimet që rrisin ekuilibrin dhe forcën tuaj mund të zvogëlojnë rrezikun e rrëzimeve që mund të dëmtojnë shpinën tuaj. Merrni në konsideratë disiplinën e tai chi-së, jogës si dhe ushtrime peshe që ndihmojnë në ekuilibrin tuaj.

Për pjesën më të madhe të të rriturve të shëndetshëm, rekomandohet të paktën 150 minuta në javë aktivitet mesatar aerobik ose 75 minuta në javë aktivitet i fuqishëm aerobik.

Gjithashtu, nëse pini duhan, duhet ta lini menjëherë atë. Duhani redukton qarkullimin e gjakut në pjesën e poshtme të shpinës, çka mund të kontribuojë në degjenerimin e diskut shpinor si dhe ndikon që shërimi nga dëmtimet e shtyllës kurrizore të jetë i ngadaltë.

Shmangia e dhimbjes së mesit në punë

Mund të ndërmerrni disa hapa për të parandaluar dhe shmangur dhimbjet e mesit dhe dëmtimet në punë. Për shembull:

· Bëni kujdes me posturën e trupit. Kur jeni në këmbë, balanconi peshën e trupit në mënyrë të barabartë mbi këmbë. Mos rrini shtrembër. Për të ndihmuar në një posturë të mirë kur jeni ulur, zgjidhni një karrige të përshtatshme për shtyllën tuaj kurrizore. Rregulloni lartësinë e karriges tuaj në mënyrë që këmbët t’i keni të mbështetura në dysheme ndërkohë që kofshët të jenë paralel me dyshemenë.

· Ngrini pesha në mënyrën e duhur. Kur ngrini dhe mbani peshë një objekt të rëndë, ngrijeni atë me muskujt e këmbëve ndërkohë që forconi muskujt e barkut. Mbajeni objektin afër me trupin. Ruani formën natyrale të shtyllës tuaj kurrizore. Mos e përthyeni kurrizin kur ngrini pesha. Nëse një objekt është tepër i rëndë për t’u ngritur, kërkoni ndihmë tek një person tjetër.

· Modifikoni punët e përsëritshme. Sa herë të mundeni, përdorni mjete specifike për ngritjen e peshave. Përpiquni të alternoni punët që kërkojnë shumë stërmundim fizik me punë më të lehta. Nëse punoni para një kompjuteri, sigurohuni që monitori, tastiera, mouse dhe karrigia të jenë të pozicionuara në mënyrën e duhur. Nëse flisni shpesh në telefon dhe shtypni në të njëjtën kohë në kompjuter, përdorni altoparlantin për telefonatat ose përdorni kufje. Shmangni përkulje apo përthyerje të panevojshme të trupit. Limitoni kohën që kaloni duke ngritur valixhe apo canta të rënda.

· Dëgjoni trupin tuaj. Nëse duhet të qëndroni ulur për një kohë të gjatë, ndryshojeni shpesh pozicionin tuaj. Bëni ecje të shpeshta e të shkurtra nëpër zyrë dhe shtriqni muskujt herë pas here në mënyrë që t’i lehtësoni ato.

Dhimbja e mesit mund t’ju shqetësojë gjatë ditëve të punës dhe kohës tuaj të lirë. Por ju mund ta ndryshoni këtë situatë. Ekzaminoni ambientet tuaja të punës dhe adresoni situata që mund të rëndojnë mbi kurrizin tuaj. Edhe disa hapa të vegjël për të lehtësuar dhimbjen e mesit janë hapa në drejtimin e duhur.