Çfarë është refluksi gastro-ezofageal dhe a është ai i rrezikshëm?

Refluksi gastro-ezofageal është një patologji, e cila ka të bëjë me kthimin e ushqimit nga stomaku në ezofag, gjë që ndodh kryesisht pak kohë pas marrjes së ushqimit, si dhe gjatë qëndrimit shtrirë. Duke qenë se përmbajtja e stomakut është e pasur me acid klorhidrik, kalimi i ushqimit të pasur me acid klorhidrik në ezofag provokon djegie, e cila përjetohet në kraharor nga fillimi i stomakut e deri në fyt. Refluksi gastro-ezofagal zakonisht fillon që në fëmijëri por vetëm një numër i vogël prej fëmijëve vazhdojnë të kenë refluks kur rriten. Nëse kjo sëmundje nuk trajtohet mund të shkaktojë dëmtim të mukozës së ezofagut në trajtën e erozioneve apo ulçerave dhe më rrallë shafqjen e kancerit kardio-ezofageal.Përveç kësaj, kjo patologji mund të çojë në laringit kronik,ndryshim të zërit ,kollë kronike,kruajtje të zërit dhe probleme të tjera.

Cilat janë simptomat e refluksit gastro-ezofageal?

Zakonisht shumica e njerëzve kanë refluks i cili shpesh nuk vihet re.Kur përmbajtjet e kthyera në ezofag rikthehen menjëherë në stomak ato nuk e dëmtojnë ezofagun.Por kur aciditeti i shtuar qëndron në ezofag fillon të dëmtojë edhe mukozën përreth tij.Kur përmbajtjet e stomakut të kthyera në ezofag kalojnë në gojë ose hyjnë në rrugët e frymëmarrjes atëherë personat që kanë problem me refluksin fillojnë të kenë zë të ngjirur ose kollë kronike.

Shenja te tjera te refluksit përfshijnë:

· pneumoni ose bronkit (si pasojë e aspirimit të lëngjeve të stomakut në rrugët e frymëmarrjes)

· vështirësi në gëlltitje

· të vjella

· dhimbje fyti

· vështirësi në frymëmarrje

· humbje në peshë

· djegie kraharori (me e shprehur tek të rriturit)

· faringit kronik

· ndryshim të zërit

· kollë kronike irrituese

Si diagnostikohet refluksi gastro-ezofageal?

Ju duhet të konsultoheni me mjekun gastroenterolog, i cili është i specializuar në trajtimin e sëmundjeve të traktit tretës. Mjeku juaj do t’ju bejë një ekzaminim të imtësishëm fizik dhe do t’ju rekomandojë ekzaminime qe vendosin përfundimisht diagnozën e refluksit gastro-ezofagal.

Testet me te shpeshta për të diagnostikuar refluksin gastroezofagal janë:

1-Skopi me kontrast e stomakut,ku përmes rrezeve X mund te shihen dëmtimet dhe funksioni i sfinkterit të poshtëm kardio-ezofagal,stomakut ose të zorrëve. Për të bërë këtë ekzaminim fillimisht ju do ju duhet të pini një lëng në ngjyre të bardhë që quhet kontrast bariumi i cili ndihmon në marrjen e imazheve nën rrezet X.Mjeku juaj nuk mund te vendosë diagnozën vetëm nëpërmjet skopisë me kontrast por kjo e fundit ndihmon në përjashtimin e problemeve të tjera serioze që kanë të njëjtat simptoma si refluksi.

2-Endoskopia (gastroskopia). Përpara kësaj procedure pacientit i bëhet një qetësuës venoz. Me anë të këtij ekzaminimi mjeku juaj mund të vlerësojë imtësisht mukozën e ezofagut, stomakut dhe duodenit.Gjithashtu gjatë ekzaminimit doktori mund të marrë disa qeliza për ekzaminim të mëtejshëm (pra biopsia).

Me cilat sëmundje të tjera ngjasojnë simptomat e refluksit?

· Dispepsia(një çrregullim funkisonal ku organet e aparatit tretës nuk funksionojnë normalisht) Fryrje

· Gogësima

· Djegësi e stomakut

· Gurët e tëmthit

· Ulçera

· Gastriti

Obeziteti dhe refluksi

Lidhja mes obezitetit dhe refluksit është vërtetuar në shumë studime. Hernia hiatale, shkaku më i shpeshtë i refluksit, shfaqet shumë më shpesh tek obezët në krahasim me personat me peshë trupore normale.Shtimi i indit dhjamor të barkut, e rrit presionin intrabdominal (situatë e ngjashme me shtatzaninë) dhe lehtëson shfaqen e refluksit.Tek obezët çrregullimet e lëvizjeve të tubit të ushqimit (peristaltika) janë shumë më të shpeshta se tek personat me peshë trupore normale (35-40%). Çrregullimet e lëvizjeve të tubit të ushqimit janë një ndër faktorët kryesore që ndikojnë në shfaqjen e refluksit.

Trajtimi i refluksit

Ekzistojnë 4 metoda për trajtimin e refluksit. Zgjedhja e metodës së trajtimit bëhet nga mjeku juaj, sipas shkallës së refluksit dhe përparimit të sëmundjes.

· Ndryshim i mënyrës së jetesës

· Trajtim medikamentoz (me ilaçe).Qëllimi kryesor i trajtimit medikamentoz i refluksit është ulje e aciditetit të lëngjeve të stomakut

· Trajtim kirurgjikal

· Trajtim endoskopik

Cilat janë produktet që shtojnë refluksin:

· Agrumet

· Domate

· Erëzat

· Nenexhiku, mentja

· Djathi kaçkavall, mish i yndyrshëm

· Cigarja dhe alkoli

· Kafeina

· Çokollata

· Pijet me gaz

.

Çfarë duhet të keni parasysh mbi refluksin:

· Të keni kujdes me konsumimin e duhanit apo alkoolit

· Të shmangi ushqimin në orët e vona dhe të mos shtriheni menjëherë pasi konsumoni ushqim

· Hani më pak dhe më shpesh dhe kujdesuni që mos të mërrni peshë

· Shmangni ushqimet e yndyrshme apo pikante

· Shmangni përdorimin e lëngjeve me gaz ,çokollatave dhe lëngjeve që përmbajnë shumë acid si lëngu i portokallit.

· Ngrini kokën e krevatit disa centimetra më lart në mënyra që koka dhe qafa të jetë me lart se pjesa tjetër e trupit. Shtimi i disa jastëkëve nuk e zgjidh problemin.

· Limitoni përdorimin e portokallit,mandarianave apo ananasit.

· Limitoni përdorimin e kafesë apo çajit të zi.

. Nëse medikamentet dhe këshillat e dietës ushqimore nuk e përmirësojnë situatën tuaj atëherë mund të rekomandohet edhe kirurgjia laparoskopike.